काठमाडौं, पुस १८ ।
भारतको सिलगुडीमा जारी रहेकाे चौथो साफ महिला च्याम्पियनशीप फुटबलको सेमिफाइनलमा नेपालले आज भारतको समना गर्दैछ । कञ्चनजंघा मैदानमा नेपाली समयअनुसार दिउँसो सवा २ बजे सुरु हुने खेल नेपालको लागि अवसर र चुनौती दुबै हो । यो खेल जितेर नेपाली महिला टीमले अहिलेसम्मकै ठूलो कीर्तिमान रच्न चाहन्छ । नेपाल यसअघिका तीन वटै संस्करणको फाइनलमा भारतसँग पराजित हुँदै उपविजेतामा समेटिएको थियो ।

यो खेल जित्यो भने नेपालले भारतलाई हराएको कीर्तिमान राख्नेछ । नेपाल समूह ‘ए’को समूह बिजेता बन्दै तथा भारत समूह ‘बी’को उपविजेता बन्दै सेमिफाइनलमा पुगेको हो । यो खेलमा पराजित भए अहिलेसम्मकै सफलतामा पूर्णविराम लाग्ने भएकाले पनि भारतविरुद्धको खेल नेपालका लागि ‘गर या मर’को रूपमा रहेको छ । अर्को सेमिफाइनलमा बंगलादेश र माल्दिभ्स भिड्ने छन् ।

साफका २०१०, २०१२ र २०१४ मा पनि नेपाल फाइनलमा भारतसँगै पराजित हुँदै उपाधिविहीन बन्न पुग्नु परेको थियो । साग खेलकुदअन्तर्गत २०१० र २०१६ को स्वर्ण पदकको खेलमा पनि नेपाली टोली भारतसँग नै पराजित हुन पुगेको थियो । त्यसैले हारमाथी हारको निरन्तरको श्रृंखला तोड्न सके आजको दिन नेपाली महिला फुटबलको लागि ऐतिहासिक र स्वर्ण हुनेछ किनकी बलियो भारतलाई रोक्दा यी सफलता हात पर्नेछन् । र, इतिहास रचिनेछ ।