काठमाडौं, पुस २२ ।
बलिउडका चर्चित अभिनेता ओम पुरीको आज बिहान ६६ वर्षको उमेरमा निधन भएको छ । अभिनेता पुरी मुम्बईस्थित निवासमा आज बिहान सुतिरहेकै अवस्थामा मृत भेटिएका थिए । पारिवारिक श्रोतकाअनुसार उनको मृत्यु हृदयघातबाट भएको बताएका छन् ।

पद्मश्री अवार्ड बिजेता पुरीका लोकप्रिया चलचित्रहरूमा आक्रोस, अर्ध सत्य, गुप्त, जाने भी दो यारों, चाची–४२० लगायत रहेका छन् । अभिनेता पुरीको पछिल्लो चलचित्र घायल रिटर्न हो । उनले सन् १९७६ मा मराठी फिल्म घासीराम कोतवालाबाट आफ्नो करिअर सुरु गरेका थिए ।

सन् २०१५ को मार्चमा उनीसँग लिइएको एक अन्तर्वार्ताका क्रममा उनले भनेका थिए, ‘मृत्यु त कहिले आउँछ थाहा नै हुँदैन । सुत्दा सुत्दै पनि मरिन्छ ।’

अभिनेता पुरीको निधनमा भारतीय प्रधानमन्त्री नरेन्द्र मोदीले पनि समवेदना प्रकट गरेका छन् । यसैगरी भारतीय चलचित्र क्षेत्रका असंख्य कलाकार, निर्माता, निर्देशक एवं शुभचिन्तकहरूले पनि उनको निधनप्रति श्रद्धाञ्जली व्यक्त गरेका छन् ।