काठमाडाैं, पुस १६
पछिल्लो समय (गाई पार्टी) राप्रपामा गायिका कोमल ओली र नायिका रेखा थापाबीचको प्रतिष्पर्धा चुलिएको छ । केही दिन अघि मात्र कार्यक्रमको सिलसिलामा झापा पुगेकी कोमल ओलीले अहिलेसम्मकै दमदार भाषण गरेकी थिइन् । उनले त्यहाँ आफू गायिकाको रूपमा नभएर राप्रपाको कार्यकर्ताको रूपमा झापा आएको मन्तव्य समेत दिएकी थिइन् ।

यता गायिका कोमल ओलीकै गृह जिल्ला दाङमा पुगेर आजै नायिका रेखा थापाले भाषण गर्दैछिन् । त्यहाँ उनी पनि एउटा नायिकाको रूपमा नभइकन राप्रपाको कार्यकर्ताको रूपमा भाषण गर्न लागेकी हुन् ।

भोलि यी कोमल ओली र रेखा थापा दुबै महेन्द्रनगरमा एउटै कार्यक्रममा उपस्थित हुने कार्यक्रम तय भइसकेको छ । राप्रपाले कलाकारलाई राम्रै मादल बनाउने भएको छ । उसले पछिल्लो समयमा कलाकारलाई प्रयोग गरी आफ्नो राजनीति चलाइरहेको छ । राप्रपा पार्टीमा यस अगाडि नै गोपीकृष्णका हल मालिक उद्धव पौडेलहरू प्रवेश गरिसकेका छन् । उनी अघिल्लो संविधानसभाको चुनावमा जमानत समेत बचाउन नसकेका उम्मेद्वार हुन् । त्यस्तै प्रदीपकुमार उदयहरू समेत राप्रपा पार्टीसँगै आबद्ध छन् ।

गत मंसिर ६ गते राप्रपा नेपाल र राप्रपाबीच एकीकरण हुँदा नेपाल प्रज्ञा प्रतिष्ठानमा कोमल ओलीले दुई पञ्च कमल थापा र पशुपति शमशेरको हातबाट माला लगाएर राप्रपा प्रवेश गरेकी थिइन् । त्यसकाे करिब महिना दिन पछाडि नायिका रेखा थापा आफ्ना आमा सरस्वतीको साथमा राप्रपा बनेकी हुन् । अहिले आमन्त्रित केन्द्रीय सदस्य पड्काउने मोहमा यी दुबैबीच कडा टक्कर देखिएकाे छ ।