एजेन्सी, जेठ १६ ।
सधैँ फास्ट फुड र कोकाकोलाको सेवनले बच्चा तथा वयश्क सबैको स्वास्थ्यमा असर पारिरहेको हुन्छ । त्यसैले गर्दा डाक्टरहरूले बच्चाहरूलाई फास्ट फुड र कोकाकोलाबाट टाढै राख्न बेला–बेलामा सल्लाह पनि दिने गरेका छन् ।

प्रायः फास्ट फुडको स्वाद मिठो हुने भएकै कारणले गर्दा बच्चाहरूलाई फास्ट फुडमा लत नै बसाल्ने गरेका छन् । इण्डोनेसियामा १० वर्षीय आर्य मोसन्त्री नामक एक बालकलाई चाउचाउ र कोकाकोलाको नराम्रो लत लागेपछि उनको स्वास्थ्यमा प्रतिकूल असर पार्नुका साथसाथै उनको तौलमा अत्याधिक वृद्धि भएर अहिले १० वर्षको उमेरमा पनि उनको तौल २०० किलो भएको छ ।

उक्त बालक अत्याधिक मोटोपनका कारण स्कूल जान र राम्रोसँग हिँडडुल गर्न पनि सक्दैन । उक्त बालकले चाउचाउ, भात, मासु, माछा, कोकाकोलालगायतका खानेकुरा निरन्तर रूपमा सेवन गर्ने गरेको जनाएको छ ।

आवश्यकताभन्दा बढी मात्रामा यस्ता चीजको सेवन गर्दा उनलाई छिन–छिनमा भोक लाग्ने गरेको छ । डाक्टरले उनको स्वास्थ्य जाँच गरी मांसहारी भोजन नगर्न सल्लाह दिएका थिए । तर, त्यसो गर्दा पनि उनको वजन नघटेको जनाएको छ । त्यसैले गर्दा डाक्टरले उनको शल्यक्रिया गरेको थियो ।

उनका आमाकाअनुसार उनले दैनिक तीन जना ठूला मानिसले खाने बराबर खानेकुरा खाने गर्छन् । उनको गत अप्रिल १७ मा पहिलो पटक सर्जरी गरी नौ किलो वजन घटाइको थियो । अहिले उनको तौल थप १६ किलो घटिसकेको छ ।